Izinkumbi zabalandeli bebhola likanobhujuzwayo zitheleke enkundleni yezemidlalo ethandekayo iMandla Magudulela Stadium, eThandukukhanya ukuzobukela iqembu lasekhaya lidlala umdlalo weNedbank Cup ngoMgqibelo zingu 11 kuMandulo wezi 2022. Inkundla ibigcwele phama! Abalandeli abaqhamuka nxazonke bebezobukela leliqembu lidlala okukuqala ngqa osesigabeni somqhudelwano ABC Motsepe League kulesizini entsha ka 2022/23.
Iqembu lasekhaya iFlymingo United FC lishaywe kabuhlungu ngo 0-2 yiqembu elisanda kusungulwa iBarberton All Stars FC eliphuma eManzana. Amagoli omabili angene ngesiwombe sokuqala lapho ububona ukuthi osokhaya bathwele kanzima. Unozinti weFlymingo United ukwazile ukuvimba amabhola amaningi ebeshaywa abagadli beBarberton All Stars nokwenze ukuthi umdlalo ushintshe ngo 2-0.
Osokhaya bazamile ukuthola umgqigqo ngesiwombe sesibili emuva kokushintsha indlela yokudlala basuke ku 3-5-2 babuyele ku 4-4-2. Kube yiko nje ukuthi belidibene nezinkakha lapha kuBarberton All Stars FC ebiphethe abadlali abangasabi ukubamba ibhola balibeke phansi lidlu’tshani. Kuningi okubhekeke kulona leliqembu laseBarberton ngoba selidlulela esigabeni esilandelayo seNedbank Cup kanye nakuLigi esazosuka.
Abalandeli bebhola laseMkhondo bashiyeke bengakanelisekile kwazise bagcina kudala ukubukela imidlalo ekulelizinga. Empeleni eMkhondo bagcina ukuba kulezinga ngeHome Defenders FC iLigi isabizwa ngoVodacom League kudala. Imibono ngeqembu iFlymingo United miningi kodwa okuqavile ukuthi abalandeli abasha nabadala bafisa ihlezi iphumelela. Sibone iningi labathandi bebhola abaphuma ezindaweni ezakhelene noMkhondo njengabasoPhongolo, eDumbe, Ermelo nakoVolksrust bezobukela lomdlalo obunesasa nje ngokuba khona kwawo.
Omunye wabalandeli uthumele umlayezo kusekela likanobhala woMkhondo LFA ethi, “Sicela ukuthi abaphathi bebhola bangenelele kuleFlymingo United ikwazi ukuthola abadlali asifuni ukumosha izimali zethu sithenge neziphuzo bese iyadliwa. Sizimisele ukushayela sisuke oPhongolo sizoyibuka kulesizini.” Ngokuphazima nje kweso iqembu selinabalandeli nxazonke yinkulu indaba lapha. Ukugcwalisa inkundla kuzoba inyo elula kakhulu ngendlela abalandeli bebhola laseMkhondo bakuthakasele ngakhona ukukhuphuka kweFlymingo United.
Okusobala ke ukuthi wonke obandekayo abaphathi beqembu, abaqeqeshi, abadlali kanye nabalandeli baphapheme futhi babonile ukuthi yinde lendlela esezohanjwa izodinga abomeleleyo. IFlymingo United izohamba lonke izwe laseMpumalanga Province. Umdlalo wokuqala kwi ABC Motsepe League uzodlala khona enkundleni yodumo iMandla Magudulela Stadium zingu 01 kuMfumfu wezi 2022.
Basazodela abalandeli.